Бүгін Қостанай академиясында Дархан Базарбавты еске алу шарасы өткізілді. 2020 жылдың 19 қаңтарында Қостанай облысында Дархан Базарбаев қызметтік міндетін атқару кезінде қаза тапты. Сол ерлігі мен қаһармандығы үшін Қазақстан Республикасы Президентінің Жарлығымен Дархан Базарбаев ІІІ дәрежелі «Айбын» орденімен (қайтыс болғаннан кейін) марапатталды. Содан бері бұл күн полиция батырының еске алу күніне айналды. 2022 жылы Қазақстан Республикасы Ішкі істер министрлігінің Шырақбек Қабылбаев атындағы Қостанай академиясында Дархан Базарбаевқа арналған аудитория ашылды. Академияның имидждік жұмыс және ішкі коммуникациялар бөлімі оқу-саптық бөлінісімен бірлесе отырып, 1 курс курсанттарына полиция қызметкері Дархан Базарбаевтың ерлігін дәріптеу мақсатында іс-шара өткізді. Бір минут үнсіздікпен басталған іс-шараға Дархан Базарбаевтың әріптестестері, сол оқиғалы күні жанында болған патрульдік полиция қызметінің инспекторы полиция аға лейтенанты Амангелді Сыздықов пен Қостанай ауданы полиция бөлімінің взвод командиры полиция капитаны Қайрат Тасмағамбетов қатысып, Дархан Базарбаевтың ерлігі жайында сөз сөйледі.